FAQ : choisir l’ENSI


يا جماعة مرحبا بيكم في هل مدونة بش نحكيلكم شوية عل لإنسي : المدرسة الوطنية لعلوم الإعلامية… ومبروك النجاح فالمناظرة وانشالله من حسن إلى الأحسن

 

– يعيشك بركالله فيك ! أحكيلنا شوية عل انسي وين جات ساعة ؟ ما تقليش مش في تونس زادة !! 

لا مش بش نقلك.. لإنسي جات في كامبوس منوبة ( المركب الجامعي بمنوبة ) عل الأوراق دنك تابعة لولاية منوبة أما ديمة تتسمى تونس الكبرى… دنك لاباس !

 

– ستناني كامبوس منوبة لي فيه الصحافة و كلية الاداب ؟ وأكل الحكاية متع العلم ؟ 

أي هذكة هو أما متخفش كل واحد على روحو راهو…  لإنسي في بنية وحدها على روحها، تي برشة يقراو صحافة ما يعرفهاش وثمة شكون يسخيلها تقري فالجنون… لإنسي منعزلة تماما عل المحيط متاعها.. وتقريبا ما عندها حتى علاقة بالمؤسسات لبحذاها !

 

– باهي وكيفاش نوصلولها ؟ 

ساهل برشة : مترو نومرو 4 تخذوا من أي بلاصة وتهبط في محطة الجامعة ( 1- قبل ترمنوس ) تقريب 40 دقيقة من وسط البلاد…

 

– البنية متع لإنسي باهية ؟ عصرية هكا ونظيفة ؟ 

ياخي بش تعرس فيها؟ لوول ! بنية جديدة من عام 2000 تقريب وعلى شكل مثلث ( نسميوه بيناتنا المثلث الماسوني )… حاجة برك خايبة فالانسي هو كثرة الدروج… لتعديه طالع هابط في الدروج أكثر ملي تعديه قاعد تقرا… فيه قاعات لكل قسم ولكل مستوى، وفيه مدرج ( امفي ) مزيان برشة ويهز 300 عبد ! فيه زوز قاعات كبار متع 100 عبد ومكتبة على زوز طوابق… وطبعاً الإدارة وبلاصة للأنشطة الثقافية…

 

– باهي ياسر.. توا فسرلي حاجة توا هي مدرسة متع فورماتيك علاش مش اسمها المدرسة الوطنية للإعلامية وكهو علاش ” العلوم الإعلامية ” ؟ ولا جوست عفسة وبرا ؟ 

هه لا مش عفسة… فورماتيك كما تقول إنت مهوش علم واحد… تجم تقول كما فيزيك لقريتو.. فيه برشة شعب، من علوم إتصالات ( télécommunication ) وشبكات ( réseaux ) ودراسة الإشارات ( etude du signal ) ورياضيات و ذكاء صناعي ( intelligence artificielle )  وليستة طويلة برشة… فالمدارس لخرى متع فورماتيك يقراو هذم كل شوية شوية ومش بالشكل لتقراه فالانسي وحاجة أخرى مهمة زادة لازم تعرفها لإنسي مدرسة نظرية بالأساس ( école fondamentale ) وماهيش تطبيقية برشة ( appliquée ) معناها بلغة أخرى بش تقرا برشة برشة مواد ومتعرش كيفاش تجم طبقها فالحياة العملية لا فالمدرسة لا مبعد كيف تتخرج مهندس…

 

– اباب ؟؟ شنوا مفماش طرف براتيك ؟؟ حتى شوية لا ؟ 

لا ثمة ! قبل صحيح ما ثماش جملة وتلامذة كانوا عملين قسم ” معرفة نظرية ” ( connaissances théoriques )  في سيرة ذاتية متاعهم ( cv ) خاطر ما عندهمش مشاريع بستثناء تربصات صيف ومشروع نهاية سنة… أما توا عملوا إصلاحات كبيرة ولاو في كل مادة تقراها ثمة مشروع معها… بطبيعة كيف نقول مشروع معناها حاجة خفيفة متع 20 30 ساعة خدمة.. مش حاجة كبيرة…

 

– معناها عنا وقت بش نعملوهم هكاك ؟ 

والله كل واحد كيفاه… وكانك ترمي فالمعنى عل جدول أوقات ( emploie de temps ) لازم تعرف راو معبي للعنكوش… تقريبا كل يوم لازم تحضر من 8h30 صباح حتاش 17h لعشية.. وساعات تقرا نص نهار ومتمشيش تفطر وساعات عندك حصص تدارك ل-19h ( وقتلي بروف يغيب ويحب يرجع سوايعو ).. ونهار سبت متسيبش قبل 14h وصارت مرة جابو لعباد تقرا نهار أحد وفالعطل رسمية ( كيف بروف يبدا عندو مايعمل وسط جمعة )

 

– لا مش مشكل… فصعة هي الحل !!!! 

لا صحيت جبتها وجيت !!! الحضور إجباري وثمة كوتا ( quota ) متع غيابات كان تفوتهم طيح كونترول ومتعديش برنسبال كيف ناس كل !!!

 

– تحكي بجدك ؟؟؟؟ ويطبقوا فيه قانون هذا ؟؟؟ 

أي يطبقوا فيه… أما ساعات يعملوا إعفاء كيف عدد متع تلامذة فاصعة يولي كبير وهذا أثار برشة مشاكل على خاطر كيف تفصع تجم تكون مرتاح خير وتقرا أحسن وتعمل مشاريعك في عقلك…

 

– اش تقصد ؟ معناها فالانسي كما تحضر كيما لا ؟ 

ساعات أي وساعات لا… برشة عباد تقري بالداتا شو ( data show ) وقاعدين يقراو فيه من غير مايفسرو شي… ثمة شكون عامل مجهودو يوسع بالو أما 45 ساعة درس كيف يبدا يقري فيه مش ساهل بش ياقف على كل حاجة ويفسرها… على هذكة تجم تقول في أغلب حالات حضور مهوش مهم برشة !

 

– والأشغال التطبيقية ؟ ( les TDs ) 

لحقيقة من ناحية الأشغال التطبيقية إنت وضمير الأستاذ.. ثمة شكون يلوحلك ورقة ويقلك دبر راسك… ( بدون تصليح ) و ثمة شكون يصلح ويعطي إصلاح… شي هذا موجود في كل بقعة !

 

– اساتذة باهين ؟ 

انسي فيها عرص معناها جماعة قوية برشة وعندهم شهرة عالمية.. أما كونو أستاذ قوي برشة في مخو عمرو لا كان ضمان ليعرف يقري ولا يعرف يوجهك في مشاريعك واختياراتك… ثمة اساتذة طيارات برشة… وتعمل جو معاهم ويحبوك فالقراية.. ولكن ثمة برشة برشة جدد عاملين إجازة وماجستير ساعات في حاجة لا علاقة بالفورماتيك ويجي يتكرم عليك ويقري فيك كينو عامل مزية… وكيف تتقوى عليه بالاسئلة يبعثك تشيت… ( بخلاف نوت في ماتيارو )

 

– نورمال في كل بلاصة هكاك… وإدارة باهية ؟ 

بربي اش تندب بها الادارة ؟ بش تناسبهم ؟ تي خدامة ربي معاهم… عاملين مجهودهم راهو.. صحيح فيها حاجات تضحك… وساعات تعمل عار ومتليقش بإدارة متع مدرسة كيف لإنسي أما كيف تخمم شوية تعذرهم : أكثر من 1000 طالب يقراو فرد وقت… كل واحد بمشاكلو ولعدد يزيد كل عام… ربي معاهم… أما إدارة على مستوى مدير كيف كيف يحاول يصلح ويعمل مجهودو… إصلاح في تونس حاجة مهوش ساهلة.. ولإنسي ماهيش إستثناء…

 

– بهي احكيلي عل مواد.. قتلي قبيلة برشة قراية… علاه شفمة ؟ 

أي… برشة برشة برشة…. تقريب في 3 سنين بش تقرا حكاية 60 مادة… وكل مادة بش تعدي عليها فرض مراقبة ( DS) وفرض تأليفي (examen)  و هذم يتعداو مرة في كل سداسي ( نحكيو على سداسي فالانسي باي باي ثلاثي البريب !! )

 

– أي وكيفه ننجح ؟ 

لازم تعدي مواد كل… و في كل مادة لازم عندك معدل أكبر من 8.. ومعدل إنت ومادة كيفه يتحسب… أما عموما فرض مراقبة (DS) يمثل 1/3 معدل و الفرض التأليفي ( examen )  دونك 2/3 معدل… الفازة لكن تكعبرلك فال-DS وجبت نوت خايبة معاش تجم تعمللها شي.. أما examen تجم تهزو فالكونترول… على هذكة DS حاجة مهمة برشة برشة… وبرشة تكعبرلهم ودوبلو خاطر لحكاية هاذي !!!

 

– دوبلو ؟؟ صلي عالنبي ! ثمة شكون يدوبل في مدرسة متع مهندسين !!؟؟ 

أي ثمة… كل عام وفي كل برومو ثمة عل أقل 10 يتكربسو وكل عام كيفه ( ثمة عام تلامذة في سنة ثالثة بش يتخرجوا وصلوا 30 واحد عودوا عام ) .. بش تنجح من عام لعام لازم تجيب معدل عام فوق 10… وتهز موادك الكل.. ويسمحولك تخلي 4 مواد تعاود تعديهم عام لبعدو كان أقل من 8… بش تنجح في سنة ثالثة لازم يكون عندك معدل عام فوق 10 وتهز مواد كل بما فيهم مواد لقدم ( matières de credits ) وأوك يعطيك 4  نقاط تجم تفرقهم عل مواد لأقل من 8 بشرط متكونش نوت أقل من 6 ! ( note eliminatoire )  

 

– اه صحيبي !!!! وكن واحد دوبل شيعمل ؟ 

ما عندو ما يعمل عندو حق في كرتوشة برك.. كن كمل استعملها و دوبل مرة أخرى بالقانون معاش عندو حق يعاود.. أما إدارة لإنسي قلبها كبير وتعطيه فرصة أخرى ( dérogation ) ووقتها لازم يعاود عام ويعاود مواد لعندو فيهم أقل من 10.. حتى لو هو بالأساس دوبل على نوت أقل من 6 وعندو 17 معدل عام !!! قانون هذكة اش يقول…

 

– نتخيل فزة هذي مصرتش قبل ! 

– هه لا كل عام تصير… تقريب ديمة ثمة مابين 5 و-10 لعداو 5 سنين فالانسي… أما على 300 نسبة تتسمى ضعيفة…. ماتخافش لاباس…

 

– علاش لعباد طيح كونترول؟ وقداه نسبة؟ 

نسبة تقريب 75% طيح كونترول… وهذي نسبة عادية جداً خاطر برشة مواد وضغط وكيف يبدا عندك مشاريع.. تولي تضيع وطيح مواد كاملة وتبدى معمل عل كونترول…

 

– ربي يستر… باهي وشنوا جو بخلاف لقراية ؟؟؟ 

والله شوف، تلامذة يصنعو جوهم راهو… لا إدارة، لا اساتذة ولا شي… وتلامذة مش جايين مل مريخ… جاين ملبريب… على هذكة زايد بش يجي واحد مل انسي ويقول مدرسة كوبي على خاطر هو بيدو كوبي واسبري كونكور ( esprit concours ) وهذي حقيقة للأسف ديمة ديمة موجودة… ريق متع تكعبرلي وما حضرت شي وداخل بصحة لبدان وبعد يهز مواد متاعو كل وطامع يخرج في فرنسا… و يقلك نكتشف فالكور ليلة اكسمان وبعد يجيب 12 هذا كل كلام فارغ… فالانسي تقرا تلقى… تلعب تتكعبرلك… ما ثماش سحر… وزادة ما ثماش عباقرة و-genie متع فورماتيك… ثمة عباد مغرومة أكثر من غيرها وتصبر وثمة عباد ماخذين قراية كرفي أعطيه يعدي ويهز موادو ويروح…

 

– معناها نفهم من كلامك لقراية وما قالت الناس ؟ 

ثمة اندية ثقافية وعلمية يعملوا في مجهودهم… وثمة نادي “جونير انسي” ( junior ensi ) يعمل في خدمة هايلة… ولكن نسبة مشاركين ضعيف برشة مقارنة بعدد تلامذة ليفوق 1000 تلقاشي 20 ولا 30 ناشط في جميع الاندية مجتمعة !!!! وديمة ترى نفس لوجوه فالاندية كل…

 

– بففف ! بهي واختصاصات كيفه ؟ 

إسمع ملخر بلا تكسير راس… مهندس يبني روحو بروحو مش بش يستنى مدرسة بش تقريه ولا تقولو اش يعمل… وحكاية اختصاصات مجرد تقسيم ساعات ما عندو حتى قيمة ! ثمة تقريب 4 اختصاصات ولكن شي لا يمنع بش تخدم ولا تعمل تربص في حاجة عمرك لا قريتها لا فالانسي ولا في حتى بلاصة… كيف تجي للانسي اتو نحكيو عل اختصاصات مهوش مشكل…

 

– باهي شبيك دز ؟ وشنية حكاية دوبل ديبلوم مع مدارس في فرنسا ؟ 

أي لإنسي عاملة إتفاقيات مع مدارس في فرنسا تبعث الأوائل في سنة أولى حسب ترتيب متاعهم… ( وهذي حاجة مش سهلة جملة بش تجي لول فالانسي ما تنسيش اسبري كونكور ) كيف كيف ما تبنيش اختيارك للانسي عل حاجة هذي… خاطر تجم تخطف كما تجم ما تخطفش ويطيروا بها صحاح… كيف تجي للانسي إخدملها… كهو…

 

– بهي شنوا أفاق متخرجين ملمدرسة ومتقليش ايجا للانسي وتو نقلك…. 

هه لا نقلك من تو… مستقبل مضمون… وناس كل تخرج تخدم ( تقريباً ) و ز…

 

– تقريبا ؟؟؟ اش تقصد ؟؟؟ 

اه صحيبي واش تكبتي !!! أي تقريبا على خاطر ثمة برشة برشة غشو رواحهم.. قراو ونجحوا فالانسي أما ما عندهم حتى مؤهل يخليهم ينجحوا فالحياة العملية… دونك يقعدوا بطالة فترة ويقعدوا يتلفحو ويعملوا ماجستير ويختارو طريق تعليم وبحث علمي… ثمة برشة انسيان مستواهم لغوي تاعب ومؤسسات توا ولات تدلل… ما تنسيش 300 انسيان يخرج كل عام.. صحيح هما مطلوبين أما هذا صنع منافسة كبيرة في بعضهم..وزادة مع مدارس أخرى كيف انسات (insat) واسبري ( esprit ) لمستواهم أقل من مهندس انسيان أما من ناحية الجاهزية متاعو في سوق العمل خير وأكثر نجاعة ( هذا يرجع عل نقطة لحكينا فيها عل فرق بن مدرسة تطبيقية ولخرى نظرية )

 

– فهمتك… إيه أما هو قلك انسي فيها جماجم وجنون متع فورماتيك… 

مو قلنا خطاك من هل لغة ! ثمة عباد مغرمة بالفورماتيك وبرشة زادة أما مش خاطر جاو بالضرورة للانسي… هذم  عباد من أولهم تبركالله عليهم وين تحطهم يتفوقو… و نرجع نقول كيف تقارن عددهم ب-300 تولي نسبة ضعيفة برشة 😦

 

– فهمتك… وين يخدمو المتخرجين؟ 

فالمطاعم وحانات ونزل سياحية !! هه ياخي وين تحبهم يخدموا ؟؟؟؟ موفي شركات مهما تكون مجال عمل متعها… وفالعموم هما مهندسين برمجيات ( developpeurs ) معناها ماكينة متع برامج ( machine à coder ) وهمو يعمل جزء خاص به فالبرمجية ويلوج كيفه يحسنها ويتعاون مع أصدقاءو فالفريق…على هذكة الاتصال ولغة وشخصية مهمة في خدمة مهندس خاطر حتى حد لا يخدم وحدو…

 

– صحيح !  كهو ؟ كان هكك يخدموا ؟ 

لا مش كان برمجيات يجموا يخدموا خدم متع إدارة (  ressources humaines, gestion, commercial … etc )  ويجموا يكونو مستشارين ( consultants ) و يجموا يبعثوا مشروعهم الخاص ( شكراً  باعث القناة ) أما يقعدوا قلة ماك تعرف ضروف الاقتصادية…

 

– وفرنسا ؟ برجولية صاحبي نحب نقطع… لإنسي تعاوني بش نقطع ولا لا ؟ 

والله عرفتك بش تجبذة لحكاية هذي !!!! هه ! باهي يا سيدي… دبلوم لإنسي مستعرفين به فالخارج.. كان ما قتعتش مع دوبل دبلوم بطبيعتك.. تجم تعمل مشروع ختم الدراسة ( PFE )  في أي بلاد ( أمريكا فرنسا كندا ) ما ثمة حتى مشكل… ولكن خدمة بعد صعيبة شوية.. خاطر تدخل فيها برشة عوامل منها البلد المضيف… وقوانينو…فرنسا على سبيل مثال مذبهوم دبلوم فرنسي بش تخدم على هذكة برشة يعملوا أي حكاية ( ماجستير مهني مثال ) بش تزيد حظوظو في عمل فالخارج.. أما زادة تخدم طول… لحكاية حكاية زهورات… أما ثمة طرفة ( astuce ) كانوا يعملوها برشة… تعمل ماجستير علمي في أي حكاية فالانسي.. وكما قتلك مو برشة اساتذة عندهم شهرة عالمية… يبعثوك للخارج على أساس بش تكمل بحوثك العلمية… أما أكثرية اش يعملوا ؟ دوب ما يوصلوا يبعثوا بحوث تشيت ويقعدوا يلوجو فالخدم.. لين تخطف… أما توا معاش ممكن خاطر تنحى ماجستير فالانسي بنسبة لطلبتها !

 

– كيفاش كيفاش ؟ شمعنها ؟ 

قبل كنت بش تخرج تقري تعمل ماجستير بصفة موازية للدبلوم مهندس… وبعد عام تتحصل على شهادة ماجستير ( معناها بعد 6 سنوات عندك زوز دبلومات ) وهذا يفتحلك باب للتدريس وبحث في شاهدة دكتوراه ! ( في تونس ولا خارج ) توا قرار جديد لتم حذف شهادة ماجستير وإعتبار شهادة المهندس كافية بش يدرس ويكمل دكتوراه.. في تونس نفهمك تمشي لحكاية.. ولكن فالخارج تجم تعمل مشاكل…

 

– باهي باهي.. راسي تعبا !!!! موسع باليك !! 

أن نحبك تعرف كل شي بالباهي بش تعرف على شنوا قادم !!! وربي معك ويوفقك !

 

– انشالله لاباس… 

بعد هذا كل بش تجي للانسي ؟؟؟؟ 

– هنه ؟؟؟

cet article a été rédigé par un ancien de l’ENSI promo 2008 

Advertisements
By Farouk Mezghich Posted in Student

One comment on “FAQ : choisir l’ENSI

  1. ya3tik essa7a férou9, c bien fait just le nombre des inscris fil les club fét b barcha, club musique akahaw plus que 20 inscris be5léf les comités d’organisation des évènements, bech t9olli quel évènement n9ollek essné lClub musique ENSI a bien organisé INGÉNIEUR EN CONCERT. ( 6 club musique de 6 écoles d’ingénieurs ont participé).
    Ainsi junior, robotique, OSSEC, le nombre d’inscris a bien augmenté.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s